٭13 جون 2003ء کو پاکستان کے معروف سیاستدان ملک معراج خالد لاہور میں وفات پاگئے۔ ملک معراج خالد 1915ء میں برکی، لاہور میں پیدا ہوئے تھے۔ انہوں نے تحریک پاکستان میں فعال کردار ادا کیا۔ ان کے سیاسی کیریئر کا آغاز 1960ء کی دہائی سے ہوا جب وہ آزاد حیثیت میں مغربی پاکستان اسمبلی کے رکن منتخب ہوئے۔ بعدازاں وہ کنونشن مسلم لیگ میں شامل ہوگئے۔ 1967ء میں جب ذوالفقار علی بھٹو نے پاکستان پیپلزپارٹی قائم کی تو معراج خالد نے اس پارٹی میں شمولیت اختیار کی اور بہت جلد بھٹو کے بااعتماد ساتھیوں میں شمار ہونے لگے۔ 2 مئی 1972ء سے 10 نومبر 1973ء تک وہ پنجاب کے وزیراعلیٰ کے عہدے پر خدمات انجام دیتے رہے۔ بعدازاں وہ مرکزی وزیر زراعت کے عہدے پر بھی فائز ہوئے۔ 1977ء میں وہ قومی اسمبلی کے اسپیکر بنے، اس عہدے پر وہ 5 جولائی 1977ء تک فائز رہے۔ 1988ء میں جب بے نظیر بھٹو وزیراعظم کے عہدے پر فائز ہوئیں تو ملک معراج خالد نے ایک مرتبہ پھر قومی اسمبلی کے اسپیکر کا منصب سنبھال لیا۔5 نومبر 1996ء کو جب فاروق لغاری نے بے نظیر بھٹو کی حکومت کا خاتمہ کیا تو ملک معراج خالد نگراں وزیراعظم کے عہدے پر فائز ہوئے۔ اس عہدے پر وہ 16 فروری 1997ء تک فائز رہے۔ملک معراج خالد لاہور میں آر اے بازار کے نزدیک ڈیرہ چال کے قبرستان میں آسودۂ خاک ہیں
