ترس گئی ہے نظر خود کو دیکھنے کے لیے

ترس گئی ہے نظر خود کو دیکھنے کے لیے
کہاں سے لائیے زنگار آئنے کے لیے

سزا کے طور پہ بھیجا گیا یہاں ہم کو
بنائے ہی نہ گئے تھے ہم اس کُرے کے لیے

زمین مل گئی آخر ہمیں بچھانے کو
اور آسمان ملا ہم کو اوڑھنے کے لیے

ابھی وہ عجز جو اعجاز کو نہیں پہنچا
دِکَھائی دیتا ہے بے تاب معجزے کے لیے

اِس اِبتلا میں یہ احسان کم نہیں اُس کا
کہ اپنا نام دیا ہے پُکارنے کے لیے

وہی تو بار ہمیں ہو گیا سرِ منزل
جو اہتمام کیا ہم نے راستے کے لیے

عجیب حال ہوا ہے مرے شبستاں کا
یہاں تو نیند بھی آتی ہے جاگنے کے لیے

جناب آپ نے تو فیصلہ سُنا ڈالا
مگر ہم آپ سے آئے تھے مشورے کے لیے