گلگت بلتستان میں کورونا وائرس کے 8 مزید کیسزز سامنے آگئے۔خطے میں اب تک کورونا وائرس کے مریضوں کی کل تعداد 21 ہوگئی محکمہ اطلاعات نے تصدیق کردی
محکمہ اطلاعات گلگت بلتستان نے اس حوالے سے تصدیق کرتے ہوئے کہا ہے کہ تفتان سے آئے ہوئے زائرین کوحکومت گلگت بلتستان نے سکردو،نگر اور گلگت کے مختلف ہوٹلوں میں انکیو بیشن پیریڈ (14 دن) مکمل ہونے تک قرنطینہ میں رکھا ہے تاکہ ان تمام زائرین کی بہتر نگہداشت ہو اور سکریننگ کی عمل سے گزر سکیں۔ ان تمام مشتبہ مریضوں کے سیمپلز اس سے قبل اسلام آباد NIH بھجوائے جاتے تھے اب جبکہ ان تمام مریضوں کے سیمپلز ڈسٹرکٹ ہسپتال گلگت میں ہی تربیت یافتہ ڈاکٹرز ٹیسٹ کررہے ہیں۔ ان مشتبہ مریضوں کے سیمپلز ڈسٹرکٹ ہسپتال گلگت میں ٹیسٹ کیئے گئیے جن میں سے 8 مریضوں میں کورونا وائرس کی تصدیق ہوگئی ہے اور ان 8 مریضوں کو فوری طور پر گلگت میں قائم آئیسولیشن رومز منتقل کردیا گیا ہے۔۔ گلگت بلتستان حکومت نے ان تمام افراد کو قرنطینہ میں بہترین انتظامات اور طبی سہولیات کے ساتھ علیحدہ رکھا تھا اب جبکہ وائرس کی تصدیق کے بعد ان 8 مریضوں کو بھی فوری طور پر آئیسولیشن رومز منتقل کیا گیا ہے جہاں پر محکمہ صحت کا عملہ ان کی بہترین نگہداشت پر مامور ہیں ۔ اس سے قبل کورونا وائرس کے مریضوں کی تعداد 13 تھی ان کو بھی آئیسولیشن رومز میں رکھا گیا ہے اور طبی عملہ ان کی بہتر نگہداشت کے حوالے سے اپنے خدمات سر انجام دے رہا ہے۔سیکریٹری اطلاعات گلگت بلتستان فدا حسین نے کورونا وائرس کے پھیلاؤ کے خدشات کے پیش نظر عوام الناس سے پر زور اپیل کی ہے کہ محکمہ صحت کے بتائے گئے رہنما اصولوں پر کاربند رہیں تاکہ یہ وبا مزید پھیل نہ سکے اور اس سے مکمل طور پر بچا جاسکے ۔انہوں نے ان تمام مریضوں کے رشتہ داروں سے بھی اپیل کی ہے کہ وہ ان سے ملنے جلنے سے اجتناب کریں ۔انہوں نے مزید کہا کہ عوام اپنے گھروں اور گردونواح میں صفائی کا خاص خیال رکھیں اور ہر کسی سے میل جول سے بھی گریز کریں ۔سیکریٹری اطلاعات کا مزید کہنا ہے کہ اس وائرس کو عالمی وبا قرار دیا گیا ہے اور اس وقت بہت سے ممالک لپیٹ میں ہے عوام کو بہت احتیاط برتنے کی ضرورت ہے۔انہوں نے کہا کہ قومیں اتحاد و اتفاق،یگانگت اور باہمی یکجہتی اور مل کر ہی مشکل حالات سے نمٹ سکتی ہے لہزا اس مسئلے کو سنجیدگی سے لینے کی ضرورت ہے۔سیکریٹری اطلاعات نے کورونا وائرس کے روک تھام ،خدشات، احتیاطی تدابیر سے متعلق کہا ہے کہ ہم عوام میں شعور و آگہی مہم کو مزید بہتر بنانے کیلئے قومی نشریاتی ادارے ،لوکل کیبلز اور اخبارات کے زریعے عوام میں شعور اجاگر کرنے کی ہر ممکن کوشش کررہے ہیں تاکہ گلگت بلتستان کا ہر فرد اس وبا کے پھیلنے سے روکنے میں اپنا کردار ادا کرسکیں ۔
