ایثار رانا کے کچھ کالم نظر سے گذرے تو اردو جملوں میں پنجابی لفظوں کے استعمال پر چونک گیا، کالم پر سرسری دوڑتی نظریں رک گئیں اور بے اختیار پورا کالم پڑھنے پر مجبور ہوگیا ، پھر کیاتھا ان کے دیگر کالم بھی ڈھونڈے اور اچھوتے انداز تحریر سے خوب لطف اندوز ہوئے۔
مجھے ایک صحافی دوست نے یہ بتاکر حیران کردیا کہ ایثار رانا لاہور کی صحافتی ہسٹری میں نوجوان ترین نیوز ایڈیٹر گذرے ہیں شاید وہ 25 سال کی ایج میں نیوز ایڈیٹر ہوگئے جس تک پہنچنے کےلئے صحافیوں کے بال سفید ہوجاتے ہیں۔
پھر میری ڈائرکٹ ایثار رانا سے ٹیلی فونک گپ شپ ہوئی تو یہ جان کرحیران رہ گیاکہ وہ بھی میری طرح پکے پرانے لہورئیے ہیں یعنی وہ موہنی روڈ سے تعلق رکھتے تھے جو ہمارے بھاٹی گیٹ کے پاس ہی واقع ہے۔ موہنی روڈ سے میری کئی یادیں وابستہ ہیں کہ حضرت پیرمکی کا مزار وہاں واقع ہے اور اگر داتا صاحب حاضری دینی ہے تو سال میں ایک بار پیرمکی بھی جانا ضروری ہوتا ہے۔ اب کا تو پتہ نہیں لیکن میرے لڑکپن میں رواج تھا کہ قربانی کے بکروں پر سٹیمپ لگوانے ہم لڑکے بالے گروپ بناکر جاتے اور ٹکسالی دروازے سے نکل کر موہنی روڈ اور پھر داتا صاحب کا لمبا چکر لگاتے۔
جب مجھے ایثاررانا نے پرانے لاہور کازکرکیا تو پتہ چل گیاکہ ان کے انداز تحریر میں یہ تازگی اور پنجابی لفظوں کا برمحل استعمال کہاں سے آیا ہے۔
مجھے یقین ہے کہ مشتقبل کی اردو پرانی اردو سے مختلف ہوگی ، اس میں پاکستان کی قومی زبانوں کے الفاظ شامل ہوتے جائیں گے جس سے اس کی وسعت پذیری اور کشادگی میں مزید اضافہ ہوگا۔ ویسے بھی ہم دیکھ رہے کہ الیکٹرانک میڈیا کے مختلف شوز میں پنجابی جملوں کا بے دھڑک استعمال ہورہا ہے جو نئے ٹرینڈ کی نشاندہی کرتی ہے ، اب وہ لوگ بھی پنجابی استعمال کررہے ہیں جو پنجابی کو جاہلوں کی زبان سمجھتے ہیں ، اس کا کریڈٹ ہمیں ان صحافیوں ، اینکرز اور شوبز کارکنوں کو دینا پڑے گا جنھوں نے تعلیمیافتہ سوسائٹی کے درجے پر پنجابی جملوں کا استعمال کرکے ماضی کے taboos توڑ دئیے اور ایثاررانا ان چند صحافیوں اور اینکرز میں سے ایک ہیں جو پنجابی زبان سے محبت رکھتے ہیں ۔
ایثار رانا نہ صرف کالم نگار ہیں بلکہ کئی چینلز پر اپنا شو بھی کرچکے ہیں نیز ایک عدد یو ٹیوب چینل بھی چلارہے ہیں جس پر تازہ ترین پولیٹکل رپورٹس چلتی رہتی ہیں ،
مجھے ایثار رانا سے بات چیت کرکے بہت خوشی ہوئی ، چونکہ مصروفیت دونوں طرف تھی تو گفتگو کا سلسلہ رک گیا لیکن امید ہے کہ مزید ملاقاتیں ہوں گی۔
وسدے رہوو ایثاررانا جی