آج پاکستان کی مشہور اداکارہ خالدہ ریاست کی برسی ہے۔خالدہ ریاست نے اپنی فنی زندگی کا آغاز 1970ءمیں لاہور سے کیا۔ انہوں نے پاکستان ٹیلی وژن کے لاتعداد ڈراموں اور ڈرامہ سیریلز میں اداکاری کے جوہر دکھائے۔ ان کے معروف ڈراموں میں لازوال، مانی، دو کنارے، ایک محبت سو افسانے، نامدار، بندش، پڑوسی، کھویا ہوا آدمی، ٹائپسٹ اور ہاف پلیٹ شامل تھے۔ ان کا آخری ڈرامہ طویل دورانیے کا خصوصی کھیل اب تم جا سکتے ہو تھا۔
چھبیس اگست 1996ءکو خالدہ ریاست طویل علالت کے بعد کراچی میں انتقال کر گئیں۔ انہیں سرطان کا عارضہ لاحق تھا۔ وہ کراچی میں سخی حسن کے قبرستان میں آسودہ خاک ہیں