کل کون سی زبان قائم رہے گی، کون سے ختم ہو جائے گی، آج یہ کہنا آسان نہیں۔ ایک سادہ سا اصول تو یہ ہے کہ جو اقوام ترقی کرتی ہیں، اُن کی زبان ترقی کر جاتی ہے۔ اگر ترقی نہ کہیں، تو یوں کَہ لیں، جو اقوام معاشی ترقی کرتی ہیں، اُن کی زبان کی ترویج ہوتی ہے۔ معاشی ترقی کیسے ہوتی ہے، یہ الگ سے مضمون بنتا ہے۔ مختصرا یہ کہ جو اقوام علم و ہُنر میں سائنس میں ترقی کر جائیں، ان کی معیشت مضبوط ہوتی ہے۔
زبانیں بنتی بھی ہیں اور زبانیں ختم بھی ہو جاتی ہیں۔ اس میں فکر مندی کی کوئی بات نہیں۔ جس زبان کی ضرورت نہ رہے، اس کے ہونے کا کیا جواز؟ اُردو زبان کے لیے خدشے کا اظہار کیا جاتا ہے کہ یہ مستقبل قریب میں ختم ہو جائے گی لیکن مجھے کبھی ایسا محسوس نہیں ہوا۔ جن کا یہ دعوا ہے کہ ”اُردو زبان نہیں، ایک تہذیب کا نام ہے“، بس اُنھیں خبر دے دی جائے کہ وہ تہذیب کب کی ختم ہوئی؛ اب محض اردو زبان باقی ہے۔ برصغیر پاک و ہند میں بل کہ کسی حد تک جنوب ایشیا میں گزرے کل ”ضرورت کی زبان“ اُردو تھی، آج بھی اردو ہی ہے اور آنے والا کل بھی اُردو کا ہے۔
یہ بھی پڑھئے:
پاکستان میں اردو کا نفاذ: اہم حقائق
آج معروف ماہر لسانیات، شاعر، مترجم اور نقاد جناب رفیق احمد نقش کا یوم وفات ہے
ہند و پاک سائنس اور ٹیکنالوجی میں ایسی ترقی نہیں کر رہے کہ ہم کہنے پر مجبور ہوں، یہاں کی زبانیں ان اقوام کی ترقی کی بدولت باقی رہیں گی۔ اس لیے کہا جا سکتا ہے، یہاں کی مقامی زبانوں کی بقا کو خطرہ ہے، لیکن اردو یا ہندی؛ در اصل یہ دونوں ایک ہی زبان کے دو نام ہیں۔ انھیں انگریزی زبان یا کسی اور زبان سے اس طرح کا خطرہ لاحق نہیں، جیسا بتایا جاتا ہے۔
کوئی شبہہ نہیں کہ انگریزی زبان، دُنیا کی بڑی زبانوں میں سے ایک ہے، لیکن بر صغیر میں طویل انگریزی راج کے با وجود، یہاں کی اقوام کے بیچ میں انگریزی زبان، رابطے کی زبان نہیں بن سکی۔ عوامی سطح پہ اُردو ہی ہے جو مختلف اقوام کے بیچ میں ابلاغی ضرورت کو پورا کرتی آئی اور مستقبل قریب کیا مستقبل بعید میں بھی ان کے درمیان ”رابطے کی زبان“ فقط اردو زبان ہی دکھائی دیتی ہے۔
پاکستانی ریاست نے کسی زبان کی ترقی کے لیے کوئی ”کارنامہ“ انجام نہیں دیا؛ اُردو کی بھی قطعا کوئی خدمت نہیں کی؛ اُس پہ یہ احوال کہ ایک ان پڑھ بلوچ، پختون، پنجابی، کشمیری، گلگتی، بلتی، سندھی، اردو میں اظہار کر لیتا ہے، سمجھ لیتا ہے، خواہ کتنی ہی ٹُوٹی پھُوٹی زبان بولے۔ کیا رابطے کی زبان کے طور پہ پاکستان میں انگریزی کے معاملے میں بھی ایسا ہی ہے کہ دو قوم کے افراد آپس میں ابلاغ کے لیے انگریزی زبان استعمال کرتے ہوں؟ میرے مشاہدے میں ایسا نہیں ہے۔ اُردو عوام کی زبان ہے اور اُس وقت تک باقی ہے، جب تک عوام کی ضرورت پورا کرتی رہے گی۔
اب اس نکتے کی طرف آتے ہیں، جس کے لیے اتنی طویل تمہید باندھی ہے۔ لسان کو عوام برتتے ہیں، لیکن لسان کی بحث عوامی نہیں ہوتی؛ یہ لسان کے طالب علموں ہی کی بحث ہے۔ اُردو کی بابت دیکھیے، تو کس لفظ کا دُرست تلفظ کیا ہے، صحیح املا کیا ہے؛ اس طرح کا مکالمہ بھی لسان کے طالب علموں کے بیچ میں ہوتا ہے۔ شاعر ادیب جب اظہار کے لیے اس زبان کا انتخاب کرتے ہیں، تو ان پہ فرض ہے، وہ اس زبان کی صحت کا خیال رکھیں۔ غلطیاں تو سبھی کرتے ہیں اور غلطیوں کرنے پر مایوس نہیں ہونا چاہیے۔ خُوب سے خُوب تر کی تلاش ہو تو غلطیوں کا امکان کم ہونے لگتا ہے۔ زبان کے معاملے میں بھی ایسا ہی ہے۔ جو لسان کے بنیادی اصولوں سے نا واقف ہو، یا اختلافی امور کے بابت اساتذہ کی رائے نہ جانتا ہو؛ ”لفظ کی سند“ مانگنے پر جواب دے کہ ”میں نے ایسا ہی پڑھا تھا“، کہاں پڑھا تھا، یہ بتانے سے بھی معذور ہو، یعنی وہ خود ہی اپنی ”سند“ ہو تو بحث وہیں تمام ہو جاتی ہے۔
لسان پہلے جنم لیتی ہے، اُس کی (کا) گرائمر بعد میں لکھی جاتی (لکھا جاتا) ہے۔ ظاہر سی بات ہے، جس کی جو زبان ہے، اسے اُس زبان کی (کا) گرائمر سیکھنے کی ضرورت نہیں؛ گرائمر اُن کے لیے ہے، جو اس لسان کو سیکھتے ہیں۔ اور یہ بھی کہ رابطے کی زبان کے طور پہ تذکیر و تانیث کی غلطیاں کوئی معنی نہیں رکھتیں؛ غلط تلفظ، غلط املا کی چھُوٹ دی جاتی ہے۔ یہی احوال کچھ شعبوں کا ہے۔ مثلا: ایک رپورٹر اندرون سندھ میں متعین ہے، وہ وہاں سے کوئی خبر رپورٹ کرتا ہے۔ اس کے لہجے میں سندھی کی چاشنی ہے تو اس سے یہ مطالبہ کرنا کہ جب تک دُرست شین قاف سے اُردو نہیں بولتا، رِپورٹنگ کا اہل نہیں۔ یہ زمینی حقائق کی نفی ہو گی۔ بی بی سی اُردو کا مقامی رپورٹر آکسفورڈ کے لہجے میں رِپورٹنگ کرنے کا پابند نہیں ہوتا۔ ہاں! اُسے صحافتی ضابطوں کا پابند رہنا ہوتا ہے۔ لیکن نیوز رُوم میں بیٹھے نیوز کاسٹر سے یہ مطالبہ کرنا دُرست ہے کہ وہ جس زبان میں خبریں پڑھتا ہے، اُس زبان کی صحت کا خیال رکھے۔
اسی طرح سوشل میڈیا پر اظہار کرنے والے کا احوال اُس رپورٹر کا سا ہے، جس کی مثال دی۔ ہر ایک پر پابندی عائد کرنا دُرست نہیں، مگر ادب تخلیق کرنے والے، یا شاعر سے یہ مطالبہ کرنا کہ وہ صحت زبان کا خیال رکھے یہ جائز مطالبہ ہے۔ کیوں کہ ایک شاعر، ایک ادیب زبان کی صحت، زبان کی ترقی کا ذمہ دار ہوتا ہے۔ ہیچ مدان کی رائے میں، بڑی زبانیں بڑے ادب کو جنم نہیں دیتیں، بڑا ادب زبانوں کو بڑا کرتا ہے۔
