ادارہ علم دوست پاکستان کی ایگزیکٹو کونسل کے ارکان نے آج (10 فروری کو) فرئیر ہال لائبریری، کراچی کا دورہ کیا اور 19 فروری کو ہونے والے سیمینار کے انتظامات کا جائزہ لیا ۔
بلدیہ عظمی کراچی کے ڈائریکٹر میڈیا منجمنٹ علی حسن ساجد نے سیمینار کے حوالے سے بلدیہ کے بھرپور تعاون کی یقین دہانی کرائی ۔
کتب خانوں کے عالمی دن اور یوم اردو پر ہونے والے سیمینار کا موضوع علم دوستی میں کتب خانوں کردار ہوگا ۔
یہ سیمینار 19 فروری بروز جمعہ شام چار بجے فرئیر ہال کتب خانے، کراچی کی تاریخی عمارت میں ہوگا ۔
اس موقع پر فرئیر ہال لائبریری میں علم دوست کے اجلاس میں سیمینار کے انتظامات کا جائزہ لیا گیا ۔
اجلاس کی صدارت علم دوست کے صدر شبیر ابن عادل نے کی ۔
بلدیہ عظمی کراچی کے تعاون سے ہونے والے سیمینار میں نیشنل لائبریری ایسوسی ایشن، لائبریری کلچر پروموشن اور تحریک نفاذ اردو و صوبائی زبان اشتراک کریں گی ۔
اجلاس میں تحریک نفاذ اردو و صوبائی زبان کے سربراہ سید نسیم شاہ ایڈوکیٹ اور نیشنل لائبریری ایسوسی ایشن کے جنرل سیکرٹری انور حسین نے پروگرام کے انتظامات کے حوالے سے مختلف پہلووٴں پر روشنی ڈالی ۔
اجلاس میں علم دوست کے جنرل سیکرٹری میر حسین علی امام کے علاوہ نورالاسلام خان، سید عبدالباسط ، تسنیم فاروقی اور م ص ایمن نے شرکت کی ۔