نوید عباس کا تعلق کراچی سے ہے, سیمان تخلص کرتے ہیں۔ غزل کے شاعر ہیں اور پیشے کے اعتبار سے صحافی ہیں۔ پاکستان کے متعدد ٹی وی چینلز پر سینئیر اسائنمنٹ ایڈیٹر، ریسرچر اور رائٹر کی حیثیت سے اپنی خدمات دے چکے ہیں۔ روزنامہ جسارت کے سنڈے میگزین میں بہ طور کالم نگار” سیمان کی ڈائری” کے عنوان سے پچھلے پندرہ برس سے مختلف موضوعات پر کالم بھی لکھ رہے ہیں۔ پہلا شعری مجموعہ زیر اشاعت ہے۔ نوید عباس کراچی پریس کلب اور آرٹس کونسل آف پاکستان کراچی کے سینئر ممبر بھی ہیں اور حال ہی میں بہ حیثیت مدیر کراچی پریس کلب کا پہلا نیوز لیٹر بھی نکال چکے ہیں۔
یہ جو رنگت ہےجاتی ہوئی شام کی
ابتدا ہے کہانی کے انجام کی
دل لگایا ہوا ہے اِسی میں مگر
جانتا ہوں یہ دنیا نہیں کام کی
سن یہ قصہ نہیں ہے کسی اور کا
یہ کہانی ہے میرے درو بام کی
ہم بھی خانہ بدوشوں کی مانند ہیں
دن گزارا کہیں تو کہیں شام کی
کوئی حاصل نہیں تھا کسی بات کا
ہم نے کوشش بھی کی اور نا کام کی
