کیا evm ہمارا رویہ بھی بدلے گی
ہم جو ایک دوسرے کی مخالفت دشمنی کی حد تک کر رہے ہیں الیکٹرانک ووٹنگ مشین کے بعد دوست ہو جائیں گے، منتخب ہونے والے وزیراعظم اپوزیشن لیڈر سے ہاتھ ملانا شروع کر دیں گے اور سب سے بڑا سوال کہ اس بات کی کیا گارنٹی ہے موجودہ حکومت اس مشین کے استعمال کے باوجود الیکشن ہارنے کے بعد یہ نہیں کہے گی کہ ہم نے جس مشین کی منظوری دی تھی وہ مشین دوسری تھی؟
کیا اس مشین کے استعمال کے بعد اپنی پارٹی کے خلاف لکھنے والے صحافیوں کے خلاف طوفان بدتمیزی بند ہو جائے گا اور پگڑیاں اچھالنے کا سلسلہ رک جائے گا؟ سنا ہے ایک ارب پچاس کروڑ ڈالر کی مشینوں سے انتخابات میں دھاندلی کا موقع اور شور ختم ہو جائے گا، اگر مشینوں سے یہ سب کچھ ہو سکتا ہے تو پھر کوئی ایسی مشین لائیں جس کے استعمال کے بعد لوگ یو ٹرن لینا چھوڑ دیں، جھوٹ بولنا ختم کر دیں ،ہمارا سب سے بڑا مسئلہ ہمارے لیڈر صاحبان کے اندر پلنے والی انا ضد اور ہٹ دھرمی ہے اپنی غلطیوں کو نہ ماننے کی روش ہے۔
اگر مشین یہ سارے مسائل حل کر سکتی تو پھر پہلی فرصت میں یہ مشین لے لائیں کیونکہ اس منظر سے زیادہ خوبصورت منظر کیا ہوگا جب وزیر اعظم صاحب اپوزیشن لیڈر سے ہاتھ ملانے کے لیے راضی ہو جائے گا اور جیتنے اور ہارنے والی پارٹی کے افراد مل کر ملک کی ترقی کے لئے پلان بنائیں گے جب جانے والوں کی best practice آنے والوں کے لئے مشعل راہ ہوگی اگر عقل سے کام لیا جائے اور دلوں میں وسعت پیدا کر لی جائے تو یہ کام مشین کے استعمال کے بغیر بھی ہو سکتا ہے مگر
بے عمل دل ہو تو جذبات سے کیا ہوتا ہے
دھرتی بنجر ہو تو برسات سے کیا ہوتا ہے
ہے عمل لازمی تکمیل تمنا کے لیے
ورنہ رنگین خیالات سے کیا ہوتا ہے
