وزیر اعظم کے معاون خصوصی ڈاکٹر ظفر مرزا نے کہا ہے کہ عیدالضحیٰ کے دوران کورونا وائرس کی روک تھام کے لیے کمیٹی تشکیل دے دی ہے،پلازمہ تھراپی کی محدود افادیت ہے، روزانہ 30 ہزار ٹیسٹ ہو رہے ہیں اور جلد روزانہ کی بنیاد پر ایک لاکھ سے زائد ٹیسٹ ہوں گے۔وزیر اعظم کے معاون خصوصی برائے صحت ڈاکٹر ظفر مرزا نے کہا ہے کہ عیدالاضحیٰ کے لیے جلد حکمت عملی بنائیں گے اور عیدالاضحیٰ سے متعلق این سی او سی میں ایک کمیٹی تشکیل دی ہے جبکہ علمائے کرام سمیت تمام اسٹیک ہولڈرز سے رابطے میں ہیں، اسمارٹ لاک ڈاوًن کے اثرات جلد سامنے نہیں آ سکتے تاہم جن شہروں میں اسمارٹ لاک ڈاوًن ہوا وہاں کورونا کیسز میں کمی آئی ہے۔
حکومتی اقدامات کورونا کے پھیلاوً کو روکنے کے لیے ہیں۔ڈاکٹر ظفر مرزا نے کہا کہ کورونا سے بچنے کے لیے کم از کم 30 ایس او پیز بنائے گئے ہیں کیونکہ لوگوں کے رویوں میں تبدیلی آنے میں وقت لگتا ہے۔ ایس او پیز پرعمل نہ کرنے کی وجوہات جاننے کے لیے پاکستانی معاشرہ سمجھنا ضروری ہے۔انہوں نے کہا کہ پاکستانی معاشرے میں لوگ قوانین پر بھی عمل نہیں کرتے۔
ایس او پیز پر بھی عمل درآمد مثالی نہیں ہے لیکن لوگ رویے میں تبدیلی لا رہے ہیں۔ ابھی تک کورونا وائرس کے لیے کوئی مخصوص دوا نہیں آئی تجرباتی دواؤں پر کلینکل ٹرائل ہو رہے ہیں جبکہ کلورو کوئین پر شکوک و شبہات پیدا ہونا شروع ہو گئے ہیں۔ ڈیکسا میتھا زون سے متعلق برطانیہ میں تحقیقات ہوئیں اور اس سے اموات کی شرح میں کمی ہوئی۔ ڈیکسا میتھا زون پاکستان میں بھی موجود ہے۔
انہوں نے کہا کہ حکومت ذخیرہ اندوزوں کے خلاف کارروائی کر رہی ہے اور اس کے تدارک کے لیے ہاٹ لائن بنائی ہے۔ ایسا نظام بنایا ہے جس کے تحت دواوًں کی کمی نہیں ہو گی ، پلازمہ تھراپی کی محدود افادیت ہے جبکہ پاکستان میں روزانہ 30 ہزار ٹیسٹ ہو رہے ہیں اور جلد روزانہ کی بنیاد پر ایک لاکھ سے زائد ٹیسٹ ہوں گے۔انہوں نے مزید کہا کہ آنے والے دن کورونا کے حوالے سے مشکل ہوں ,گے جبکہ جون میں کورونا کے کیسز اور اموات میں اضافہ ہو گا۔ جولائی کے وسط یا آخر میں شاید کورونا کیسز میں ٹھہراؤ پیدا ہو۔
