جوش ملیح آبادی 5 دسمبر 1894ءکو ملیح آباد میں پیدا ہوئے۔ جوش کے والد نواب بشیر احمد خان، دادا نواب محمد احمد خاں اور پر دادا نواب فقیر محمد خاں بھی شاعر تھے۔ گویا ہورا خاندان کے سبھی لوگ صاحب دیوان شاعر تھے۔
انھوں نے نو برس کی عمر میں پہلا شعر کہا۔ ابتدا میں عزیز لکھنوی سے اصلاح سخن لی۔ پھر یہ سلسلہ منقطع ہوگیا اور خود اپنی طبیعت کو رہنما بنایا۔ عربی کی تعلیم مرزا ہادی رسوا سے لی۔ فارسی اور اردو کی تعلیم مولانا قدرت بیگ ملیح آبادی سے حاصل کی۔
یہ بھی پڑھئے:
چار دسمبر: بانی تکبیر محمد صلاح الدین کا یوم شہادت
سندھ کا نیا بلدیاتی نظام کراچی میں کیا کچھ بدلے گا؟
جوش نے حیدرآباد (دکن)، دہلی، کراچی اور اسلام آباد کئی شہروں میں زندگی گزاری۔ دو رسالوں کلیم اور آج کل کے مدیر رہے۔ کئی فلموں کے گانے اور مکالمے لکھے۔ پاکستان آنے کے بعد اردو لغت کے مدیر رہے۔
انھوں نے متعدد شعری مجموعے یادگار چھوڑے۔ اپنی خودنوشت یادوں کی برات کے نام سے تحریر کی۔ جنگل کی شہزادی، ایسٹ انڈیا کمپنی کے فرزندوں سے خطاب، مناظر سحر، تلاشی اور فتنہ خانقاہ آپ کی مشہور نظمیں ہیں۔ حسین اور انقلاب وہ مرثیہ ہے، جس نے مرثیہ گوئی کے ایک نئے دبستان کی بنیاد رکھی۔
ستر کی دہائی میں جوش کراچی سے اسلام آباد منتقل ہوگئے۔ 1978ءمیں انہیں ان کے ایک متنازع انٹرویو کی وجہ سے ذرائع ابلاغ میں بلیک لسٹ کردیا گیا۔ کچھ ہی دنوں بعد ان کی مراعات بحال کردی گئیں۔
حضرت جوش ملیح آبادی نے22فروری 1982ء کو اسلام آباد میں وفات پائی۔ وہیں آسودہ خاک ہوئے۔ ان کی تاریخ وفات معروف شاعر نصیر ترابی نے ان کے اس مصرع سے نکالی تھی۔ ”میں شاعر آخر الزماں ہوں اے جوش“۔
