طاہر حنفی26 نومبر 1955 کو راولپنڈی میں پیدا ھوئے ۔ ایم اے پولٹیکل سائنس پنجاب یورسٹی سے 1981 اور ایم ایس سی ڈیفنس اینڈ اسٹریٹیجک سٹڈیز کی ڈگری نیشنل ڈیفنس یونیورسٹی اسلام آباد سے 2007 میں حاصل کی۔ آپ ایشیا پیسفک سنٹر ہونولولو ہوائی امریکہ2004 اور برمنگھم یونیورسٹی برطانیہ 2008 سے بھی سیکیورٹی اینڈ سٹریٹجک اسٹڈیز میں فارغ التحصیل ہیں 33 برس تک پاکستان کی قومی اسمبلی میں ملازمت کے بعد 2015 میں ایڈیشنل سیکرٹری کے عہدے سے ریٹائر ہوۓ شاعری کا آغاز 1970 میں کیا ان کے پہلے شعری مجموعہ ،، شہرِ نارسا ،، کا، اپریل 2014 میں پہلا ایڈیشن اور جون 2014 میں دوسرا ایڈیشن شائع ھوا دوسرا شعری مجموعہ “گونگی ہجرت” 2019 میں شائع ہوا اور پاکستان اور بیرونی ممالک کے ادبی حلقوں میں اسے خوب سراہا گیا ہے
جدید اور خوبصورت لب و لہجے میں اشعار کہتے ہیں آئیے ان کے کچھ اشعار آپ کی بصارتوں کی نذر
۔۔۔۔۔۔۔۔۔۔۔۔۔
وہ جسم و جاں کو چھپائے تو پھر بھی عریاں ہے
کہ میری آنکھ میں رقصاں ہے رہبری کا لباس
۔۔۔۔۔۔۔۔۔۔۔
یہ ضرورت بھی عجب چیز ھے طاہر حنفی
پھر ترے پاؤں میں اک دنیا سمٹ آئی ھے
۔۔۔۔۔۔۔۔۔۔۔۔
خود اپنی کھوج میں محبوس ہو گئے طاہر
کئی دنوں سے تو ہم اپنی ہی امان میں ہیں
۔۔۔۔۔۔۔۔۔۔۔۔۔
میں اپنے عہد کی زندہ مسافتوں کا نشاں
خود اپنے آپ کو دیکھوں تو خوف آئے مجھے
۔۔۔۔۔۔۔۔۔۔۔۔۔۔
فنا کا ہاتھ خوابِ زندگی کے
کواڑوں تک رسائی چاہتا ھے
۔۔۔۔۔۔۔۔۔۔۔۔۔
اڑا کر خاک دشتِ آرزو میں
جنوں کیسی کمائی چاہتا ھے
۔۔۔۔۔۔۔۔۔۔۔۔
یہ دستک بے صدا کیسی ھوئی ھے
ہر اک لمحہ دہائی چاہتا ھے
۔۔۔۔۔۔۔۔۔۔۔۔۔۔
دھاگے خوشی کے اپنے بدن سے لپیٹ کر
زخموں کی بستیوں میں رہے آب دیدہ لوگ
۔۔۔۔۔۔۔۔۔۔۔۔۔۔۔
ہم وہ نادان کہ پتھر کے کھلونے لینے
گھر سے نکلے بھی تو شیشے کی دکاں تک پہنچے
۔۔۔۔۔۔۔۔۔۔۔۔۔۔۔۔
اس شہرِ نارسا میں رسائی کا جرم کر
پتوں کی شہ رگوں پہ لکھائی کا جرم کر
۔۔۔۔۔۔۔۔۔۔۔۔۔۔۔
یقیں سے دور ہیں یعنی فقط گمان میں ہیں
ابھی غنیم کے سب تیر بس کمان میں ہیں
۔۔۔۔۔۔۔۔۔۔۔۔۔۔۔
یہ شہرتوں کی تمنا نہ آرزوئے کمال
کہ میں فقیرِ زمانہ ہوں اور جوگی ہوں
۔۔۔۔۔۔۔۔۔۔۔۔
ہوا نے چہروں پہ لکھے ہیں ایسے غم لوگو
ہتھیلیوں پہ لہو سے کیا رقم لوگو
۔۔۔۔۔۔۔۔۔۔۔۔۔
اس ایک لفظ نے کتنی اذیتیں دی ہیں
ہمارے لب سے نکلتا تھا جو دعا کی طرح
۔۔۔۔۔۔۔۔۔۔۔۔۔
طاہر ملی ھے مجھ کو گواہی وجود کی
اب میں ہی کہہ رہا ہوں غمِ زندگی کی بات
۔۔۔۔۔۔۔۔۔۔۔۔
بچھڑ گیا تھا کہیں راہ میں جنوں میرا
پھر اس کے بعد وہ بے گھر دکھائی دیتا ھے
۔۔۔۔۔۔۔۔۔۔۔۔۔
سانسوں کے اس سفر میں بچھڑنے کی بات کیا
لفظوں سے اب نہ درد کا منظر تراشنا
۔۔۔۔۔۔۔۔۔۔۔
یا نفرتوں کے ساتھ مجھے کر زمین بوس
یا اپنی خودسری مرے قدموں میں ڈال دے
۔۔۔۔۔۔۔۔۔۔۔
تمازتوں کے سفر میں یہ قہر آیا ھے
نہ راہ ختم ہوئی اور نہ شہر آیا ھے
۔۔۔۔۔۔۔۔۔۔۔
کون کا غذ پہ لکھی بات کو اب پڑھتا ھے
سوچ آئے تو ہواؤں پہ بھی لکھتے رہنا
۔۔۔۔۔۔۔۔۔۔۔۔
معجزہ یہ ہے کہ منزل کے نشاں تک پہنچے
برف کے لوگ بھی سُورج کے جہاں تک پہنچے
۔۔۔۔۔۔۔۔۔۔۔۔۔۔
کتنے مٹی کے بدن تیز ہواؤں کے طفیل
کاغذی ناؤ میں پانی کے مکاں تک پہنچے
۔۔۔۔۔۔۔۔۔۔۔۔۔
